Speed.
Sa bike, ito yung madalas natin naiisip na unang gawing upgrade.
Sa mga Pinoy bikers kasi, ang term na speed pag usapang pyesa ng bike, hindi yan yung distance per time talaga e, o yung bilis ng takbo.
Yan yung bilang kung ilan yung cogs sa likod ng bike, doon sa may cassette o sprocket.
Pag sinabing 7-speed, 7 yung bilang ng cogs sa likod. 8-speed naman walo. Meron pa 21 speed, 20 speed, 24 speed, 27 speed at madami pang iba. Ito naman yung combination na din na kasama yung bilang ng plato sa chainring. Parang 3×7, 2×10, 3×8, at 3×9 lang.
Nakasanayan na lang din ng mga kapadyak yan.
Kahit naman sa pagbili ng chain, itatanong sayo kung ilang speed. Sa pagbili ng shifters, ilang speed. Sa pagbili ng cassette ilang speed. Pati sa pagbili ng rear derailleurs syempre.
Paano ba makakapagupgrade ng speed ng bike?
Yun ang susubukan natin sagutin sa post na ito.
Madalas sa mga budget bikes, naka 7 o 8-speed lang yan. Natural lang na maisip mo na magupgrade ka sa mas mataas na speed. Yun naman talaga kasi yung upgrade. Pero ano nga ba yung upgrade dyan?
Ang upgrade dyan, kapag dumadami yung cogs, tumataas yung bilang nito, lumiliit din yung pinakamaliit na cog at lumalaki din yung pinakamalaking cog. Hindi lang yun, lumiliit din yung gap ng bilang ng ngipin ng bawat cog habang mas dumadami yung cogs sa sprocket.
Halimbawa sa 7-speed.
Sa Trinx M136, 7-speed lang itong bike na ito. 14-28T ang range ng cogs nito.
Kapag nag upgrade ka sa 9-speed, ang cogs na maari mo magamit ay nasa 11-32T o 11-36T.
Ano ang nabago dyan?
Yung 14T mo, naging 11T na. Ibig sabihin nun, nagkaroon ka ng mas mabigat na gear na ang resulta, magkakaroon ka ng mas mataas na top-speed, basta kaya mo lang padyakin.
Yung 28T mo naman, naging 36T na. Ibig sabihin nun, nagkaroon ka ng mas magaan na gear na magagamit mo pang ahon. May mga ahon din kasi na sobrang kunat na kailangan talaga ng magaan na gear kung hindi ka naman masyadong malakas na rider at gusto mo pa mapadyak yung akyat na yun.
Kahit sa 8-speed na setup, tulad ng sa Trinx M500, naka 13-32T naman ito. Mas upgrade ito kung ikukumpara sa setup ng 7-speed, pero mas upgrade pa din kung ikukumpara sa mas mataas na speeds.
In a sense, tama nga naman na mauupgrade talaga yung speed o bilis mo sa bike nito dahil mas tataas nga yung high speed mo dahil doon sa mas maliit na cog.
Ano ang mga kailangan palitan?
Halimbawa, naka 7 o 8 speed ka tapos balak mo mag upgrade sa, sabihin na natin na 10 speed agad para medyo sulit ang upgrade. Kailangan mo bumili ng mga to:
- 10-speed rear derailleur
- 10-speed chain
- 10-speed cassette sprocket
- 10-speed shifters
Minsan, hubs din kasi karaniwan sa stock hubs ng 7 o 8 speed na budget bike, naka thread type pa yun. E ang mga mabibili mo na sprocket karaniwan ay cassette type na. Kung naka combo shifter pa ang bike mo, tapos magpapalit ka ng shifter, kailangan mong idamay na din yung brake levers. May choice ka kung mag stay ka pa din sa mechanical disc brake o upgrade mo na sa hydraulic.
Pwede ba na hindi magpalit ng hubs?
Kung thread type yung hubs mo, di mo pwede ilagay dun yung cassette type na sprocket.
Kung 11-speed yung cassette mo, dapat 11-speed ready yung hubs na gagamitin mo.
Pwede ba na hindi magpalit ng shifter?
Pwede pero kung ilan lang yung bilang sa shifters mo, yun lang din ang magagamit mo. Parang balewala din kung nag upgrade ka ng cogs kasi di mo din naman mapapakinabangan.
Pwede ba na hindi magpalit ng rear derailleur?
Pwede, pero kung magkaiba ng rated speed ang rd at shifters, hindi sila compatible. Tatalon yun pag mag shift ka na.
Pwede ba na hindi magpalit ng kadena?
Kailangan magpalit ng kadena para walang issue sa drivetrain kasi iba iba din ang taba ng kadena depende sa rated na speed nito.
Ang maganda talaga, dapat pare pareho ng speed ang mga drivetrain components. Kung ayaw mo ng sakit ng ulo mula sa hindi swabeng shifting, wag ka na mag mix-and-match ng mga pyesa mula sa magkakaibang antas ng speed sa drivetrain.
Yung 7 at 8 speed pwede pa paghaluin. Same pa din sila ng chain, sa rd naman, yung Tourney rd na karaniwan ay kayang kaya mag 7 o 8 speed. Kaya lang, same thing applies, pag nai-mix mo yang dalawa, 7 speed lang magagamit mo.
Anong mura na pyesa?
LTWOO na yata ang pinakamurang upgrade ng speed kung tutuusin. Sa cogs naman, yung Weapon Shuriken cassette, maganda din kasi may warranty naman at maganda ang quality ng pagkakagawa. Kaya lang, limited pa lang din sa range ng cogs. Sa hubs naman, pinaka mura na ang Shimano non-series hubs.
Ako, nag upgrade ako sa 10-speed mula sa 9-speed. Para lang din ma-test at ma review yung LTWOO A7. Nadagdag lang sa range ng cogs ko ay yung 42T. Mas magaan yun sa 1-1 na gearing ko kesa dati kung ikukumpara ngayon. Pero kapag nag 1x setup na ako, mas mabigat na ng konti kahit yung 42T ko kung ikukumpara ko sa 1-1 ng 9-speed ko dati.
Worth it ba mag upgrade?
Sa pag upgrade ng groupset, habang tumataas kasi yung level ng groupset, tumataas yung speed syempre, bukod doon, tumataas din yung ganda ng performance nito at kalidad ng pagkakagawa doon sa pyesa.
Para sa mga naka budget bikes na 7 o 8 speed, kung maguupgrade kayo sa hydraulic brakes, kung ako ang tatanungin, kesa bumili ng shifter na same speed pa din sa current setup, mas ok siguro na bumili na ng 9 o 10 speed na shifter para pahanda na sa magiging upgrade sa future. Dahil kahit hindi mo sabihin, dadating din ang pagkakataon na maiisipan mong mag upgrade sa mas mataas na speed.
Kung current setup, 9 speed o 10-speed, pwede pa yan, upgrade lang ng cogs kung trip mo ng mas malaking plato sa sprocket.
Pero nasa biker naman na talaga yan, kung gusto mag upgrade sa mas magandang pyesa, hindi natin pipigilan yan. Mahirap pigilan yan, kasi baka lumala ang sakit, dapat dyan ginagamot agad. 😂
Leave a Reply