Nagbabalak ka ba mag-upgrade ng fork sa MTB mo?
Madalas sa mga budget bikes, yung suspension forks nila, matigas, o minsan nag-i-stuck up kalaunan pag tagal. Hindi kasi ganun kaganda ang gawa dito, di mo din masisisi kasi kailangan ma-maintain nya yung mababang presyo ng built bike.
Kung dumating ka na sa puntong nais mo mag upgrade ng fork, para sa iyo ang post na ito.
Isa din sa magandang iupgrade ang fork ng bike. Kapag mas magandang klase yung fork na ipapalit, sigurado makakabawas ka sa kabuuang bigat ng bike. Mas kumportable na din dahil mas maganda na yung play, at higit sa lahat, maari mo pang i-setup depende sa klase ng rides na gagawin mo.
Ang upgrade naman, depende sa budget yan. Simulan muna natin sa pinakamababang budget.
Suntour XCR Fork
- Budget: P2500-4999
Hanggang ngayon, XCR pa din yung fork na gamit ko. Yun kasi ang nakakabit sa bike ko nung binili ko iyon. Hindi ko pa din naipupush na palitan, dahil para sa akin, maganda pa din naman ang performance niya. Pero naiisip ko na din na magpalit minsan, pero sinasabi ko na lang na kapag nagkaproblema na, saka ko na lang papalitan.
XCR Air yung gamit ko na may lock-out. Yung nabibili ngayon sa halagang P2500 ay hindi pa yun air-type. Coil spring na fork lang yun. Mas magaan yung air syempre, pero mas mahal yun at parang wala din ako nakikita na masyado na binebenta na ganung fork dito.
Pero kung nagbabalak ka magpalit ng fork at mababa lang yung budget mo, atleast XCR na dapat, kahit di pa siya air type, nakaksigurado ka naman na matibay at tatagal.
Epicon / Epixon Fork
- Budget: P6000-7000
Suntour din ang may gawa nitong Epicon fork. May variant din na Epixon, mas bagong labas daw iyon. Pero ayon sa sabi sabi, mas maganda daw ang Epicon kesa sa bago na Epixon. Mas matibay daw at mas madali i-service. Yan ang nababasa ko dati tungkol sa fork na yan.
Siguro kaya walang XCR Air na nabibili dito, dahil kung mag air fork naman ang mga bikers, edi Epicon/Epixon na.
Meron pang Epixon Stealth na hindi halata ang decals. Mas mahal pa yun, e parang decals lang naman ang naiba.
Manitou Fork
- Budget: P8000-12000
Isa din itong Manitou Forks sa mga napipisil ko na fork na bilihin kapag maguupgrade ako. Pinagiisipan ko kung sasagadin ko na sa Manitou Marvel o Machete yung budget ko, o mag M30 lang ako. Medyo mahal na din kasi.
Dito sa Manitou ko madalas makita yung arko na nasa likod e. Base sa nabasa ko, wala naman daw advantage yun sa nasa harap na arko tulad ng sa ibang tinidor.
Air type din ang suspension na ito, madalas ganito yung nakikita ko sa mga lumalaro sa mga MTB races.
RockShox Fork
- Budget: P10000-20000+
Di ko kabisado itong forks na ito. Pero alam ko lang na highly recommended din itong shock na ito. Serviceable, maganda ang performance, may kamahalan nga lang din.
Kung kaya naman ng budget, edi sige lang.
Fox Fork
- Budget: P28000+
Hindi ko din kabisado itong mga Fox forks. Pero isa sa mga patok na nakikita ko itong Fox 32. Madalas ganito ang nakikita kong forks ng mga yayamanin na bikes. Pang mayaman na kasi ang presyo nitong fork na ito, kaya sa mga pang mayaman na build karaniwan ganito ang nakakabit. Magaan, at panigurado maganda ang performance.
Special mention:
Rigid Fork
- Budget: P2300
Hindi na din bago na sumagi sa isip ng MTBiker na mag rigid fork. Lalo pa kung madalas sa kalsada lang naman ang rides niya. Kapag mas gusto nya gumaan at bumilis, rigid fork talaga ang naiisip na gamitin. Malaki nga naman ang igagaan kapag nag rigid fork ka na.
Mosso M5 ang sikat na rigid fork. Aluminum siya, mura din. Meron ding ganitong rigid forks na galing sa ibang brands. Pero yung Mosso talaga ang recommended ng mas nakakarami.
Kapag nag-rigid fork ka, lahat nga lang ng bumps sa gulong, mararamdaman ng katawan mo kasi wala ng suspension na mag aabsorb nito. May trade off din sa gaan. Pero dahil MTB naman yung gamit, at kung naka MTB tires pa din, pwede naman babaan pa yung tire pressure para kahit papaano makaabsorb din yun ng bumps.
Paano pumili ng fork?
Bukod sa budget, may ibat iba pang bagay na dapat iconsider sa pagpili ng bibilhin na fork sa mountain bike.
Travel: Una sa gamit, ano ba ang setup ng MTB na gusto mo? Kung may frame ka na, kung XC ba ito, may tamang travel ng fork na para dito. Karaniwan sa XC mababa lang ang travel. Sa DH naman, sila yung kailangan ng mataas na travel ng fork. Dapat, i-check mo din yung kung anong travel lang pwede sa batalya mo para hindi masira ang geometry nito at mag risk ka na baka bumigay dahil sa hindi nya intended na gamit.
Hubs: Depende din sa hubs na gamit mo kung anong fork ang dapat mo bilihin. Yung mga mas mahal na forks ay thru axle na, at thru axle type hubs lang ang pwede doon. Karaniwan naman mga normal lang na quick release hubs yung.
Tapered/Non-tapered: Depende sa headtube ng bike frame mo, meron kasing straight at tapered. Pwede mo pa din gamitin ang straight na fork sa tapered na headtube, gagamit ka lang ng headset na may converter. Pwede din vice-versa, pero hanggat maari mas maganda pa din na kung ano yung headtube, ganun din yung fork na gagamitin.
Bale ayun na nga, sana ay may natutunan kayo kahit papaano sa post na ito. Nakapili na ba kayo ng fork? Anong fork ang bibilhin nyo? Hindi pa din ganun kalawak ang kaalaman ko pero meron namang mga basic kahit papaano. Hanggang sa susunod ulit mga kapadyak. Suggest naman kayo ng iba pang topic na nais nyo gawan ng tagalog post. Ride safe!
Leave a Reply