Foxter FT304 vs Trinx X1

Hindi ko pala nai-feature ang Foxter FT304 na MTB. Medyo matagal na din yun lumabas. Pero dati kasi, hindi ako bilib masyado dito sa FT304 na ito kasi gawa ng FT301. Sa tingin ko noon, mas sulit pa din talaga yung 301. Medyo malaki yung diperensya nila sa presyo pero sa specs, hindi naman nagkakalayo. Bale, ibang style lang ng pintura sa frame ang malaking kaibahan nila.

Ngayon naman ikukumpara natin itong Foxter FT304 MTB sa Trinx X1. Highly recommended ko ngayon ang Trinx X1 lalo na kung may budget ka para dito. Ang ganda kasi ng frame, ng fork, ng specs, sulit na sulit. Pero tignan pa din nating maigi ang specs nilang dalawa para mapagkumpara natin ng dikitan.

photo credits: Bike Haus

Trinx X1

Brand

Kung brand muna ang titignan natin, Foxter vs Trinx? May pagkakataon na mas bet ko ang Foxter na MTB, kasi mas sulit. Pero kung brand lang din ang titignan, mas panalo na yung Trinx. Bakit? Unang una, may presence sila online. May sarili silang website na kung saan makikita natin ng kumpleto at detalyado ang bawat bikes na binebenta nila. Madami ding resellers at distributors sa Pilipinas, may partnership pa sa mga sikat na artista bilang brand ambassadors. Samantalang ang Foxter, hanggang ngayon hindi ko pa din sigurado kung saan ba galing ang bikes nila. Sayang lang, sikat pa naman ang Foxter sa Pinas at sa Bangladesh din pala. Di natin sure kung Taiwan ba o China, ika nga sa isang forum: “Chaiwanese” daw. Kumbaga sa mga banda, parang ghost band itong Foxter.

• Panalo: Trinx.

Price

Nasa P13500 ang SRP ng Trinx X1, ito naman Foxter FT304 ay nasa P12000 kahit na 2016 pa ito lumabas. Sa presyo, mas mura ang Foxter FT304, pero halos konti lang naman ang diperensya nila at kung titignan natin mabuti ang specs nila sa baba, kapag naikonsidera natin ang “price-to-specs ratio” at hindi ang “raw number” na kung alin lang yung may mas mababang price, kung alin ang mas sulit, itong Trinx X1 pa din ang mananalo.

• Panalo: Trinx X1

Frame

Parehas lang sila na alloy frame, pero mas maganda pa din ang frame ng Trinx X1. Tulad nga ng nasabi ko sa review natin sa Trinx X1, hindi kagaya ng ibang lower priced MTB ni Trinx ang frame nitong Xtreme series. Iba ang geometry, maganda ang porma, maganda ang kulay, smooth weld at naka internal cabling na din. Sa FT304 naman, parang kagaya lang ng sa FT301. Hindi pa internal cabling at hindi din smooth weld. Hands-down talaga ako sa X1.

26er nga lang ang Trinx X1, yung FT304 naman ay 27.5. Di ako sure sa sizes nitong Foxter pero sa Trinx may sizes ka na mapagpipilian: 15, 17, at 19.

• Panalo: Trinx X1

Itutuloy pa ba natin ito? Dito pa lang, ewan ko na kung bakit mo pa iisipin na piliin ang Foxter 304 kesa sa Trinx X1.

Fork

Sa fork naman, yung sa X1 ay air-type na at magnesium ang material. Marketed ni Trinx na magaan yung bike na ito kaya expect natin na magaan din yung fork na ito. Sa 304 naman, lock-out lang ang specs, may lock-out din yung sa X1, e baka bakal pa at coil-spring type pa din itong sa 304 malamang.

• Panalo: Trinx X1

Specs

Shimano Altus parts na kasi yung nasa X1, sa 304 naman yung rear derailleur lang ang Altus. Naka 3×8 speed yung sa 304, naka 3×9 speed naman sa Trinx X1. Parehas lang naka hydraulic brakes na. Parehas din na Prowheel crank pero sa itsura parang mas magandang modelo yung Prowheel crank na nasa X1. Yung hubs naman, di kilala yung nasa 304, pero yung nasa X1 ay sealed bearing Novatec hubs na.

• Panalo: Trinx X1

Verdict

Kayo na ang humusga. Ang lamang lang ng Foxter FT304 sa Trinx X1 ay 27.5 siya na MTB samantalang 26er naman yung isa. Di mo ramdam ang diperensya nito pero kung titignan natin ang physics sa likod nito, sabihin natin na parehas kayo ng gearing at parehas din ng pag-pidal, mas malayo ang distansya na makukuha ng 27.5 na gulong kasi mas malaki siya kumpara sa 26-inches na gulong.

Pero pag nagride naman kayo wala ng kaso yan. Baka nga mas mabilis pa ang X1 sa karera kasi mas magaan ito. Para sa akin ang mas mahalaga pa din ay kung alin ba ang mas maganda at mas sulit sa pera, kaya kung yang dalawang bikes na yan ang pinagpipilian mo, sa Trinx X1 ka na.